Հայաստանի պաշտոնյաները, այդ թվում` ոստիկանության, զինված ուժերի ու քրեակատարողական հիմնարկների ղեկավարությունները անպատիժ են թողնում լեսբի, գեյ, բիսեքսուալ, տրանսգենդեր և ինտերսեքս (ԼԳԲՏԻ) անձանց նկատմամբ բռնությունների ու խտրականության դեպքերը, ասվում է ԱՄՆ պետքարտուղարության` 2015թ. մարդու իրավունքների իրավիճակի վերաբերյալ տարեկան զեկույցում` հրապարակված ապրիլի 13-ին:
«Իշխանական կուսակցության ներկայացուցիչները և իշխանությանը կից լրատվամիջոցները հավասարություն խթանելու փոխարեն, շարունակում են ԼԳԲՏԻ համայնքի դեմ ատելության կոչերով հանդես գալ` ամրապնդելով երկրում անպատժելիության մթնոլորտը»,- հղում անելով Փինք Արմենիայի տարեկան զեկույցին` նշված է ուսումնասիրության մեջ` ավելացնելով, որ ԼԳԲՏԻ մարդիկ ենթարկվում են ֆիզիկական բռնությունների, սպառնալիքների, ոտնձգությունների, ինչին ոստիկանությունը անտարբեր վերաբերմունք է ցուցաբերում: Փինք Արեմնիան հոկտեմբերի 17-18 Հայաստանում կայացած ԼԳԲՏ համաժողովից հետո` մասնակիցների ստացած բազմաթիվ սպառնալիքների առիթով ոստիկանություն է դիմել և զեկույցում նշված է, որ հոկտեմբերի դրությամբ իրավապահները հետաքննություն էին իրականացնում, սակայն գործը կարճվել էր «հանցակազմի բացակայության» պատճառաբանությամբ:
Փինք Արմենիային հղում անելով` զեկույցում նկարագրվում է դեպք, երբ 2015թ. օգոստոսի վերջին Երևանի կենտրոնում 5 հոգով հարձակվել ու ծեծել էին երկու տրանսգենդեր անձանց: Մինչ ծեծը տուժողները վազել են ՀՀ գլխավոր դատախազության մուտքի մոտ՝ հույս ունենալով, որ դատախազության ծառայողները օգնություն կցուցաբերեն: Սակայն, ինչպես նշում են 2 տուժողները, դատախազությունից չեն արձագանքել, դուռը չեն բացել, փոխարենը դատախազության ծառայողները ներսից լուռ հետևել են, թե իրենց ինչպես են ծեծում:
Պետքարտուղարության զեկույցում անմասն չի մնացել նաև «Իրավունք» թերթը. «ԼԳԲՏԻ անձինք, որոնց ֆեյսբուքի հաշվիները հոմոֆոբ հոդվածում հրապարակել էր «Իրավունք» թերթը 2014թ. մայիսին, շարունակում են ճնշումների ենթարկվել: Նրանցից մեկը հայտնել է, որ բազմաթիվ սպառնալից նամակներ է ստանում, որ կգտնեն իր հասցեն ու վնաս կհասնեն: Աշխատանքային խտրականության պատճառով, նա չի կարողանում գործ գտնել»:
Զինծառայության մասով ասվում է, որ բացահայտ գեյ անձինք ազատվում են ծառայությունից` ելնելով ենթադրությունից, որ ծառայակիցիների կողմից բռնության կենթարկվեն, սակայն այդպիսիք ազատվում են հոգեկան խանգարումներ ունենալու հիմնավորմամբ, ինչն այդ մարդկանց համար հետագայում դժվարություններ է ստեղծում աշխատանք գտնելու կամ վարորդական իրավունքներ ձեռք բերելու հարցում: Իսկ գեյերը, որոնք ծառայել են բանակում, ենթարկվել են ֆիզիկական և հոգեբանական բռնությունների:
Ազատազրկվածների մասով հղում է արված քրեակատարողական հիմնարկների դիտորդական մարմնին` նշելով, որ նրանք անընդհատ ենթարկվում են նվաստացուցիչ վերաբերմունքի, այլ ազատազրկվածներ ստիպում են նրանց նվաստացուցիչ աշխատանքներ կատարել, իսկ հիմնարկի ղեկավարությունը նրանց առանձնացնում է մյուս ազատարկվածներից: Քրեակատարողական հիմնարկներում ամենավատ պայմաններում հենց ԼԳԲՏԻ մարդիկ են ապրում, ասված է զեկույցում: